اسمك جميل
حجارو نفيسة
مشكلة من الياقوت والمرجان
ح حسن باهي
وحضن دافي
يقطر حب وحنان
ب الاولى
بهاء ساطع
وبراءة صادقة
قل مثيلها فهاد الزمان
ي ينسون وياسمين
وروايح فايحة زكية
تعطر كل مكان
ب الثانية اسيادي
بسمة حلوة
وبلسم
للجرح شافي
كانو عمرو ما كان
ه همسة رقيقة
وخيط رفيع ذهبي
فيه ترصصات الحروف السابقة
تشكل عقد جميل
ما ليه مثيل
ما لبساتو حورية
وما بدعاتو يد فنان
حبيبة اسم بديع
لريحانة فقلب بستان
فاقت ببهاها
الورد والزهر
والنرجس وبلعمان
حبيبة اسم كتبتو
فكتاب الخلد
بمداد المعزة
ولبست جنحين من الشوق والهيام
وحلقت
ونقشت حروفو الساطعة
فراس جبل عالي
ما وطاتو قدام انسان
يلمع
ويشع
يرسل انوارو للسفح والوديان
وديان المحبة الصادقة
وديان السلم والامن والامان
اسمك يا حبيبة
من مكانو ساطع
وهاكداك يبقى وما يطولو نسيان
حبيبة
سمية محبوبة عند كل عاشق ولهان
ينادي بها حبيبتو معرفة
من قديم الزمان
وانت
جمعتي الاسم والسمية
والحب صعيب قوي وجارف
ما يحكمو منطق ولا قانون ولا سلطان
هاد الكلام نظمتو
باللون لبيض والوردي
وبكل الوان القوس الزاهية
مختارة من كل الالوان
وتمنيت نطرزو بخيوط من الذهب
على ثواب حرير مزركشة
ونشرو
ونصدح بيه فجميع الاوطان
لكن
ما عندي حيلة
واليد قصيرة
وما انا الا انسان
_________________
القلب الكبير
موضوع: الا سم والسمية 
11/1/2008, 1:42 pm
